30 Yanvar 2023

VERGİLƏR

SOSİAL-İQTİSADİ ONLAYN QƏZET

Sahibkar Faiq Osmanlı: “Kreditlə saldığımız bağlarda Azərbaycanda indiyədək becərilməyən bir çox meyvələr yetişdiriləcək”

  • 2018-ci ildən bugünədək kənd təsərrüfatı məhsullarının emalı üçün 73 layihəyə 70 milyon manata yaxın güzəştli kredit ayrılıb.

  • Astara rayonunda indiyədək ölkəmizdə yetişdirilməyən bir çox meyvələrin becərilməsinə başlanacaq.

Azərbaycanda qeyri-neft-qaz sektorunun ümumi daxili məhsuldakı (ÜDM) xüsusi çəkisi getdikcə artır və bunda aqrar sahədə yerli istehsalın genişlənməsinin mühüm rolu var. Ölkədə aqrar sahənin dəstəklənməsi üçün aparılan islahatlar, kənd təsərrüfatı istehsalçılarına verilən xüsusi güzəştlər və digər stimullaşdırıcı iqtisadi tədbirlər yerli istehsalın həcminin ildən-ilə çoxalmasına, sahibkarlığın inkişafına böyük təkan verir.

Dövlət tərəfindən güzəştli kreditlərin verilməsi bu dəstək mexanizmlərindən faydalanan sahibkarların sayının da artmasına səbəb olur. 2018-ci ildən bugünədək kənd təsərrüfatı məhsullarının emalı üçün 73 layihəyə 70 milyon manata yaxın güzəştli kredit ayrılıb.

Dövlətdən aldığı kredit hesabına təsərrüfatını genişləndirən sahibkarlıq subyektlərindən biri də meyvəçilik və əkinçilik sahəsində fəaliyyət göstərən “AZORGANIK” kənd təsərrüfatı korperatividir. Bir necə sahibkarı ətrafında birləşdirən korporativə Göyçay, Ağdaş, Goranboy və Astara rayonlarındakı meyvə bağları və illik əkin sahələri daxildir. Korporativ hər rayonda oranın iqlim şəraitinə uyğun meyvə bağları (məsələn, Göyçayda nar, nektarin, şaftalı; Ağdaşda heyva, nar, xurma, alça bağları və s.) salıb.

“AZORGANIK” Kənd Təsərrüfatı Korperativinin sədri Faiq Osmanlı son dövrlərdə dövlətin belə korporativləşməyə önəm verdiyini, dövlət qurumlarının onların təsərrüfatlarının qurulmasına böyük dəstək göstərdiyini deyir. Korporativin fəaliyyətinə aqrotexniki dəstəyi Kənd Təsərrüfatı Nazirliyi, maliyyə dəstəyini isə İqtisadiyyat Nazirliyi göstərir.

F.Osmanlı son illərdə sahibkarlığa dövlətin dəstəyinin artdığından xüsusilə razıdır. Onun sözlərinə görə, şəffaflaşma sayəsində sahibkarların işləri daha da rahatlaşır.

“İstər hüquqi, istər texniki, istərsə də maddi formatda olsun - bütün sahələrdə prosedurların asanlaşdığını hiss edirik. Subsidiyalarla yanaşı, Kənd Təsərrüfatı Nazirliyinin Aqrar Kredit və İnkişaf Agentliyinin (AKİA) vasitəsilə güzəştli şərtlərlə 200 min manat həcmində kreditlərdən istifadə etmişik, Sahibkarlığın İnkişafı Fondundan aşağı faizlərlə kreditlər almışıq. Ən böyük dəstəklərdən biri kənd təsərrüfatı sahəsində çalışan fermerlərin gəlir vergisindən azad olmasıdır”.

“AZORGANIK” sonuncu dəfə bu il İqtisadiyyat Nazirliyinin Sahibkarlığın İnkişafı Fondunun xətti ilə aldığı 1 milyon manat güzəştli kredit hesabına Astara rayonunda 45 hektar ərazidə avokadonun, 10 hektar ərazidə isə yeni limon sortlarının yetişdirilməsi üçün bağ salır. Dövlətin ayırdığı krediti yeni təsərrüfatların qurulması üçün böyük dəstək sayan sahibkar deyir ki, İqtisadiyyat və Kənd Təsərrüfatı nazirliklərinin dəstəyi ilə Astara rayonunda indiyədək ölkəmizdə yetişdirilməyən bir çox meyvələrin becərilməsinə başlanacaq: avokado, manqo, marakuya, taiti lime, qreypfrut, pomela, limonun yeni növləri (Zagara Bianca, Kutdiken, Enterdonant, Lamas, Yediveren), kinkan, banan, portağal (karakara, Sweet Red, Fukomoto Navel növləri), naringinin WMurcott növü ölkəmizdə yetişdiriləcək: “Bəzi meyvələr, məsələn, banan, pitaya, papaya Astarada açıq şəraitdə də yetişdirilə bilər. Amma onların bir qismi istixana şəraitində yetişdirilməlidir. Buna görə də bizim layihəmiz iki mərhələdən - açıq ərazidə və istixana şəraitində bağların salınmasından ibarət olacaq. İlk mərhələnin həyata keçirilməsinə İqtisadiyyat Nazirliyi dəstək göstərib. Layihəmiz uğurla davam edir, artıq avokado və limon bağlarının salınması prosesi yekunlaşıb. Layihəmizin ikinci mərhələsində istixana şəraitində banan, pitaya və papaya meyvələri yetişdiriləcək. Bununla bağlı banklarla və İqtisadiyyat Nazirliyi ilə müzakirələr aparırıq. Layihəmizin ikinci hissəsinə dəstək alsaq, onu çox qısa zaman ərzində həyata keçirə, bu ilin sonunda ilk banan və pitaya məhsullarımızı əldə edə bilərik”.

F.Osmanlının sözlərinə görə, yeni saldıqları bağdan əldə edəcəkləri meyvələrin satışına və ixracına təxminən 3 il sonra başlayacaqlar: “Sadaladığım meyvələrin hamısı ölkəyə idxal edilir. Bu idxalın bir qisminin qarşısını alsaq, ölkədən valyuta çıxmasının da qarşısı müəyyən qədər alınar. Tinglərini əkdiyimiz meyvələrə həm daxili, həm də xarici bazarda yetərincə tələbat var. Ona görə məhsulumuzu istər daxili, istərsə də xarici bazarda rahatlıqla sata biləcəyik”.

İlhamə İSABALAYEVA

İqtisadiyyatƏsas kapitala yönəldilmiş vəsaitlər artıb VergiXalis mənfəətin bölüşdürülməsi necə tənzimlənir? İqtisadiyyatSafiddin Jurayev: “Yeni beynəlxalq nəqliyyat dəhlizi Azərbaycanda və Özbəkistanda yeni bazarlar açacaq” Ekspert RəyiKənd təsərrüfatı məhsulu istehsalçısından mal aldıqda rəsmiləşdirmə və verginin hesablanması İqtisadiyyatİqtisadiyyat nazirinin birinci müavini Göyçayda vətəndaşları qəbul edəcək İqtisadiyyatSİF tərəfindən ötən il kiçik və orta həcmli layihələrə 104,2 milyon manat güzəştli kredit verilib VergiƏDV vaxtında ödənilmədikdə hansı sanksiya tətbiq olunur? VergiDövlət Vergi Xidmətinin Aparatına daxil olmuş faktiki şikayətlərin sayı 9% azalıb İqtisadiyyatÖtən il ÜDM-in tərkibində qeyri-neft-qaz sektoru üzrə əhəmiyyətli artım qeydə alınıb İqtisadiyyatİqtisadiyyat nazirinin vətəndaş qəbulunun vaxtı dəyişdirilib