Qeyri-rezidentlərin vergi öhdəlikləri

Bəzən təcrübədə qeyri-rezidentin göstərdiyi xidmətə görə ödənişlər zamanı ƏDV və ödəmə mənbəyində tutulan verginin hansı məbləğdən tutulmasına yanlış yanaşmalar olur.

Mühasibat və vergi üzrə ekspert Ramin Ramazanov bu məsələyə aydınlıq gətirərək bildirib ki, qeyri-rezidentin Azərbaycan Respublikası ərazisində göstərdiyi xidmətə görə əldə etdiyi gəlirlərdən vergi Vergi Məcəlləsinin 125-ci maddəsinə əsasən tutulduğu halda, həmin xidmətlərə görə ƏDV 169-cu maddəyə əsasən hesablanıb büdcəyə ödənilməlidir.

Tutaq ki, Azərbaycanda daimi nümayəndəliyi olmayan "B" qeyri-rezident şirkəti ƏDV ödəyicisi olan rezident "A" şirkətinə xidmət göstərib. Müqavilə üzrə göstərilmiş xidmətin dəyəri 1.000 ABŞ dollarıdır. Qeyri-rezidentə ödəniş zamanı, ilk növbədə, müqavilənin şərtlərinə baxmaq lazımdır. Burada iki variant mümkündür. Şərtlərə əsasən, 1.000 dolların net, yoxsa gross məbləğ olması müəyyənləşdirilməlidir.

Misal 1. Müqavilənin şərtlərinə əsasən, qeyri-rezidentdə ödəniləcək məbləğdən ödəmə mənbəyində tutulan vergi tutulduqdan sonra qalan hissə qeyri-rezidentə ödənilməlidir. Bu halda, verginin tutulması aşağıdakı kimi olacaqdır:

1000*10% ÖMV= 100 USD
1000*18% ƏDV= 180 USD

Misal 2: Müqavilənin şərtlərinə əsasən, qeyri-rezidentə ödəniləcək məbləğ net məbləğdir, yəni xidmətin dəyəri ödəmə mənbəyində tutulan verginin məbləği qədər artırılmalıdır. Qeyri-rezidentə 1.000 dollar ödənilməlidir. Bu halda, vergitutma aşağıdakı kimi olacaqdır:

(1000/90*100)*10% (ÖMV) = 111.11 USD
1000+111.11=1111.11 USD
1111.11*18% ƏDV = 200 USD

Fərqanə ALLAHVERDİQIZI