İstehlakçıların aldadılması hallarının qarşısı alınır

İstehlakçıların malın ölçüsünə, çəkisinə və hesabına dair aldadılması onların hüquqlarını pozmaqla yanaşı, eyni zamanda bazarda sağlam rəqabət mühitinə də mənfi təsir göstərir. Bu səbəbdən Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyi tərəfindən belə halların aşkarlanması və qarşısının alınması məqsədilə mütəmadi nəzarət və maarifləndirmə tədbirləri həyata keçirilir.

Bu ilin yanvar-avqust ayları ərzində Dövlət Agentliyinə məhz istehlakçıların aldadılması halları ilə bağlı 396 müraciət daxil olub. Bu müraciətlərin 306-na baxılıb, 130-u isə təmin edilib. Bundan əlavə, istehlakçıların aldadılması halları ilə bağlı Agentlik tərəfindən 17 inzibati protokol tərtib edilib. İstehlakçılar malın ölçüsünə, çəkisinə və hesabına dair aldadılması hallarında atılacaq addımlar, eləcə də bu sahədə mövcud hüquqi tənzimləmə alətləri barədə ətraflı məlumatı Dövlət Agentliyinin təşəbbüsü ilə yaradılan http://istehlakchi.gov.az portalı vasitəsilə əldə edə bilərlər.