Naxçıvanda mebel istehsalçıları ilə görüş keçirilib
Naxçıvan Muxtar Respublikasının iqtisadiyyat naziri Kazım Hüseynəliyev muxtar respublikada mebel istehsalı ilə məşğul olan sahibkarlarla görüş keçirib.
Nazirliyin məlumatına görə, görüşdə sənaye sektorunun, o cümlədən mebel istehsalı sahəsinin inkişaf perspektivləri, mövcud imkanlar və qarşıda duran vəzifələr müzakirə olunub. Nazir Kazım Hüseynəliyev çıxış edərək Naxçıvanda sənayenin inkişafının, istehsal həcminin artırılmasının, ixrac imkanlarının genişləndirilməsinin və müasir texnologiyalara əsaslanan istehsal modellərinin tətbiqinin vacibliyini diqqətə çatdırıb. Həmçinin sahibkarlara dövlətin təqdim etdiyi təşviq mexanizmlərindən səmərəli şəkildə faydalanmağın əhəmiyyəti bildirilib. Kazım Hüseynəliyev qeyd edib ki, nazirlik bundan sonra da öz səlahiyyətləri daxilində sahibkarlara dəstək göstərməyə davam edəcək.
Görüş çərçivəsində mebel istehsalı sahəsində fəaliyyət göstərən sahibkarlar öz müəssisələri və fəaliyyətləri haqqında məlumat verib, təkliflərini səsləndirib. Müvafiq məsələlər ətrafında müzakirələr aparılıb və sahibkarları maraqlandıran suallar cavablandırılıb.
