2024-cü ildə Heydər Əliyev Beynəlxalq Aeroportu 7,537 milyon sərnişinə xidmət göstərərək bu rəqəmi əvvəlki illə müqayisədə 31 faiz artırıb. Uçuşların sayı 59 238-ə çatıb, marşrutların sayı isə 80-ə yüksəlib. Hava limanından istifadə edən aviaşirkətlərin sayı 40-a çatıb ki, onların 18-i aşağıbüdcəli daşıyıcılardır.

Hava limanının məlumatına görə, tranzit sərnişinlərin sayında da nəzərəçarpan artım müşahidə olunub. Ötən ildə bu göstərici 130 faiz artaraq 373 383 nəfərə çatıb. Bakı–Naxçıvan reyslərində 3 419 uçuş həyata keçirilib, bu istiqamətdə sərnişin sayı isə 728 min nəfər olub (+4 faiz).

Strateji inkişaf planı çərçivəsində aeroportda bir sıra mühüm infrastruktur layihələri həyata keçirilib. Uçuş-enmə zolaqlarından biri beynəlxalq standartlara uyğun yenidən qurulub. 4 332 metrlik yolların tikintisi və təmiri başa çatdırılıb.

Heydər Əliyev Beynəlxalq Aeroportu ətraf mühitin qorunması istiqamətində də ciddi addımlar atıb. 2024-cü ildə karbon qazı tullantıları 8 faiz azaldılıb, enerji qənaəti isə 260 kVt/saat təşkil edib. Aeroport, həmçinin, “Airport Carbon Accreditation” (ACA) proqramının “Azaltma” mərhələsinə nail olaraq, ekoloji davamlılıq sahəsində öz mövqeyini gücləndirib.