Bu ilin yanvar-sentyabr aylarında Naxçıvan Muxtar Respublikasında qeydiyyatdan keçən POS-terminalların sayı ötən ilin müvafiq dövrü ilə müqayisədə 57,1 faiz, POS-terminallar üzrə dövriyyə 23,8 milyon manat və ya 41,6 faiz artıb.

Muxtar Respublikanın İqtisadiyyat Nazirliyinin məlumatına görə, bu barədə nazir müavini, nazir vəzifələrini müvəqqəti icra edən Abbas İsmayılov Naxçıvanda səfərdə olan Visa şirkətinin Azərbaycan üzrə ölkə meneceri Nurlan Hacıyevin rəhbərlik etdiyi nümayəndə heyəti ilə görüşü zamanı deyib.

Bildirilib ki, hesabat dövründə Muxtar Respublikada nağdsız əməliyyatlar üzrə dövriyyə 309,5 milyon manat və ya 74,8 faiz artıb. “ƏDV geri al” layihəsinin geniş tətbiqi də nağdsız dövriyyələrin artımına müsbət təsir göstərib. Belə ki, 2024-cü ilin 9 ayında Naxçıvanda istehlakçılara qaytarılan 1037,2 min manat ƏDV məbləğinin 75 faizi və ya 778,6 min manatı nağdsız ödənişlər üzrədir.

Əlavə olaraq bildirilib ki, qeyri-dövlət sektorunda əmək müqavilələri və əməkhaqlarının “ağardılma”sı nağdsız qaydada ödənişləri genişləndirir.