Sualım işğaldan azad edilmiş ərazilərdə göstərilən fəaliyyətlər zamanı vergi güzəştlərinin tətbiq edilməsi ilə əlaqədardır. Qanunda "işğaldan azad edilmiş ərazilərin rezidentləri" deyilir. Bu məsələyə aydınlıq gətirməyinizi xahiş edirəm. Güzəştdən istifadə edə bilməsi üçün vergi ödəyicisi mütləq işğaldan azad edilmiş ərazilərdəki vergi orqanlarında qeydiyyatda olmalıdırmı? Bakıda və ya digər ərazilərdə qeydiyyatda olan vergi ödəyicilərinin işğaldan azad edilmiş ərazilərdə göstərdiyi fəaliyyətdən əldə olunan gəlirə bu güzəştlər tətbiq edilə bilməz?

İqtisadiyyat Nazirliyi yanında Dövlət Vergi Xidmətindən bildirilib ki, işğaldan azad edilmiş ərazinin rezidentləri 2023-cü il yanvarın 1-dən etibarən 10 il müddətində mənfəət (gəlir), əmlak, torpaq və sadələşdirilmiş vergidən azad edilib. Vergi Məcəlləsinin müddəalarına əsasən, vergi azadolması işğaldan azad edilmiş ərazidə vergi uçotuna alınan və malları (işləri, xidmətləri) işğaldan azad olunmuş ərazinin rezidentlərinə təqdim edən hüquqi və fiziki şəxslərə münasibətdə tətbiq olunur.

Vergi Məcəlləsinin 226.2-ci maddəsinə əsasən, bu fəslin məqsədləri üçün işğaldan azad edilmiş ərazinin rezidenti dedikdə, həmin ərazilərdə vergi uçotuna alınan və bilavasitə həmin ərazilərdə fəaliyyət göstərən hüquqi və fiziki şəxslər başa düşülür.

Vergi Məcəlləsinin müddəalarına əsasən, işğaldan azad edilmiş ərazinin rezidenti işğaldan azad edilmiş ərazi ilə yanaşı, həmin ərazidən kənarda da (Azərbaycan Respublikası ərazisi daxilində) eyni növ fəaliyyəti həyata keçirdiyi halda, bu maddədə nəzərdə tutulan vergi azadolmaları həmin şəxslərə şamil edilmir. Bu halda, vergi ödəyicisi işğaldan azad edilmiş ərazidə göstərilən fəaliyyətlə həmin ərazilərdən kənarda göstərilən digər fəaliyyət növləri üzrə əldə olunan gəlirlərin və xərclərin uçotunu hər bir fəaliyyət növü üzrə ayrılıqda aparır.

Əsas: Vergi Məcəlləsinin 226-cı, 227-ci maddələri