Şeyx Faisal Bin Abdulla Al-Ravas: “İş adamlarını təcrübəmizdən istifadə etməyə çağırıram”
“Körfəz ölkələri bərpaolunan enerji, logistika, sənaye və başqa sahələrdə öndə gedir. Buna görə də Azərbaycanın iş adamlarını strateji tərəfdaşlıqlar yaratmaq üçün Körfəz ölkələrinin təcrübəsindən istifadə etməyə çağırıram”.
Bunu Azərbaycan - Körfəz Əməkdaşlıq Şurasına (KƏŞ) üzv ölkələrin 2-ci iqtisadi forumunda KƏŞ Ticarət Palataları Federasiyasının (FGCCC) sədri Şeyx Faisal Bin Abdulla Al-Ravas deyib.
Onun sözlərinə görə, dövlətlərin imkanlarına baxmayaraq, Körfəz ölkələri ilə Azərbaycan arasındakı ticari-iqtisadi əlaqələr hələ istənilən səviyyəyə çatmayıb. Buna görə də müştərək fəaliyyətin gücləndirilməsi lazımdır. Ölkələr fəaliyyətlərini getdikcə genişləndirərək ticarət dövriyyəsinin həcmini daha da yüksəldə bilərlər: ”Yanaşmalar özəl sektoru investisiya yatırmağa həvəsləndirməyə hədəflənib. Özəl sektorun bu əlaqələrin inkişafında mühüm rol oynaması başlıca hədəf kimi götürülüb. KƏŞ ölkələrinin rəqabətədavamlı məhsulları 195 ölkənin bazarına daxil olub ki, onların arasında Azərbaycan da var”.
