Azərbaycanda “Ağıllı Sənaye Hazırlığı İndeksi” (SIRI) qiymətləndirmə metodunun tətbiqi genişləndiriləcək.

Bu barədə Dördüncü Sənaye İnqilabının Təhlili və Koordinasiya Mərkəzinin (4SİM) icraçı direktoru Fariz Cəfərov deyib.

Onun sözlərinə görə, SIRI sənayedə rəqəmsallaşmaya hazırlıq dərəcəsini ölçmək üçün 16 fərqli istiqamətdə təşkilatların müəyyən qiymətləndirmədən keçməsini təmin edən proqramdır.

“Bu qiymətləndirmənin metodologiyası Dünya İqtisadi Forumu tərəfindən qəbul edilən yeganə qiymətləndirmə indeksidir. Biz onu Azərbaycanın iki böyük təşkilatında - “SOCAR Polymer” və “AzerGold” şirkətində tətbiq etmişik ki, müəyyən edək bu şirkətlərdə rəqəmsallaşma üçün hansı çağırışlar, hansı boşluqlar var və bu boşluqları aradan qaldırmaq üçün hansı addımlar atılmalıdır. Bu məqsədlə rəqəmsallaşma üzrə yol xəritəsi hazırlanıb. Bu il ərzində də biz daha çox təşkilatda bu proqramın tətbiq olunmasına nail olmaq istəyirik”, - deyə F.Cəfərov qeyd edib.