Bu ilin yanvar-noyabr aylarında Azərbaycandan Almaniyaya 758,9 milyon ABŞ dolları dəyərində 1,16 milyon tondan çox bitumlu süxurlardan alınan xam neft və xam neft məhsulları ixrac olunub.

"Azərbaycan iqtisadiyyatı" Teleqram kanalının Dövlət Gömrük Komitəsinin hesabatı əsasında apardığı hesablamalara görə, bu, 2022-ci il ilin eyni göstəricilərini dəyər ifadəsində 34,6 faiz və ya 195,2 milyon dollar, həcm baxımından isə 44,8 faiz və ya 359,4 min ton üstələyir.

Təkcə cari ilin noyabr ayında bu ölkəyə 162,6 milyon dollar dəyərində 227,5 min ton xam neft məhsulları ixrac edilib ki, bu da oktyabr ayı ilə müqayisədə dəyər ifadəsində 2,4 dəfə və ya 95 milyon dollar, həcm olaraq isə 2,5 dəfə və ya 137,2 min ton çoxdur.