Bu ilin yanvar-noyabr aylarında Azərbaycanın Belçika ilə ticarət dövriyyəsinin ümumi həcmi 25,1 faiz və ya 17,6 milyon ABŞ dolları artaraq 87,9 milyon dolları üstələyib.

“Azərbaycan iqtisadiyyatı” Teleqram kanalının Dövlət Gömrük Komitəsinin hesabatı əsasında apardığı hesablamalara görə, cari ilin ilk 11 ayında Azərbaycandan Belçikaya 19,8 milyon dollar dəyərində məhsul ixrac edilib ki, bu da 2022-ci ilin eyni göstəricisindən 89,5 faiz və ya 9,3 milyon dollar çoxdur.

Belçikadan Azərbaycana idxal edilən məhsulların dəyəri isə 13,8 faiz və ya 8,2 milyon dollar artaraq 68 milyon dollar təşkil edib.

Cari ilin yanvar-noyabr aylarının nəticələrinə görə, ölkənin ümumi ticarət dövriyyəsində Belçika ilə ticarətin payı 0,18 faiz təşkil edib ki, bu da bir il öncəki göstəricidən 0,04 faiz bəndi çoxdur.