“Dördüncü Sənaye İnqilabı xidmət sektorunun genişlənməsinə səbəb olacaq”. Bunu iqtisadçı ekspert, “Freedom Holding” korporasiyasının təsisçisi Timur Turlov “Azərbaycan iqtisadiyyatı” Teleqram kanalına bildirib.

Onun sözlərinə görə, süni intellektin təsiri altında insanların işi daha da yaradıcı olacaq və avtomatlaşdırılacaq: “Biz tamamilə fərqli sahələrdə yaradıcı işlərin avtomatlaşdırılmasının artması ilə qarşılaşacağıq və son nəticədə bu, xidmətlər sektorunun genişlənməsinə, ÜDM baxımından daha da böyüməsinə səbəb olacaq. Bu, işsizliyə səbəb olmayacaq, lakin kifayət qədər ciddi texnoloji dəyişikliyə gətirib çıxaracaq, istedadı önə çıxaracaq”.

Ekspertin fikrincə, innovasiyaların stimullaşdırılmasında hökumətlər mühüm rol oynayır: “Hesab edirəm ki, dövlətin əsas rollarından biri bazarda yüksək rəqabət mühitinin saxlanılması və açıq siyasətin aparılmasıdır. Belə bir siyasətlə innovativ şirkətlər üçün tənzimləyici maneələr azaldılır, yerli sahibkarlarla dialoq kifayət qədər fəal şəkildə qurulur və birbaşa xarici investisiyaların aktiv cəlb edilməsi dəstəklənir”.

T.Turlov qeyd edib ki, rəqabət olan şəraitdə işləmək infrastrukturun yaradılması və inkişafı üçün çox vacibdir. Bütün bunlar təhsilin və müxtəlif sosial obyektlərin rəqəmsallaşdırılması ilə birlikdə iqtisadi inkişaf üçün əlverişli mühit yaratmalıdır.

Tamilla MƏMMƏDOVA