Azərbaycan afrikalı turistlər üçün maraqlı məkan ola bilər. Bunu “vergiler.az”a Biznesin Davamlılığı və İnnovasiyalar Mərkəzinin Afrika üzrə prezidenti Edvard Mvaba Ndalama deyib.

Onun sözlərinə görə, Azərbaycan özünü dünyanın hər yerindən, o cümlədən Afrikadan gələn qonaqlar üçün turizm məkanı kimi tanıtmaq istiqamətində fəal işləyir.

“Azərbaycanın afrikalı turistlər üçün cəlbedici olmasının bir neçə səbəbi var: Birincisi, mədəni müxtəliflik: ölkəniz müxtəlif sivilizasiyaların təsirini özündə ehtiva edən zəngin mədəni irsi ilə tanınır. Bura gələn ziyarətçilər ölkənin zəngin mədəniyyətini nümayiş etdirən tarixi yerlər, muzeylər və abidələr ilə tanış ola bilirlər.

İkincisi, təbii gözəllik: Azərbaycan Xəzər dənizinin sahillərindən tutmuş Qafqazın qarlı dağlarına qədər rəngarəng mənzərələri özündə birləşdirir. Bu, açıq havada gəzinti, xizəksürmə, çimərlik tətilləri üçün imkanlar yaradır”, - ekspert qeyd edib.

O, vurğulayıb ki, Bakı qədim və müasir memarlığın, o cümlədən YUNESKO-nun dünya irsi obyektləri olan İçəri şəhərin və simvolik Alov Qüllələrinin yurdudur. Şəhərin memarlıq abidələri dünyanın hər yerindən, o cümlədən Afrikadan gələn turistlərin marağını cəlb edə bilər.

“Eyni zamanda, Azərbaycan mətbəxi öz dadına görə fərqlənir. Afrikalılar plov, dolma və kabab kimi ənənəvi Azərbaycan yeməklərindən ləzzət ala bilərlər.

Bundan əlavə, Azərbaycan öz isti qonaqpərvərliyi ilə tanınır. Bu, afrikalı turistlərə qaldıqları müddətdə özlərini evdəki kimi hiss etmələrinə və mehriban atmosferdən həzz almağa imkan verə bilər”, - Edvard Mvaba Ndalama deyib.

Mütəxəssislərin fikrincə, Azərbaycanda ilboyu Bakı Beynəlxalq Caz Festivalı, Qobustan Qaya İncəsənəti və Mədəni Landşaft Festivalı, Novruz bayramı kimi müxtəlif mədəni tədbirlər keçirilir. Bu tədbirlər afrikalı turistlər üçün Azərbaycan mədəniyyəti və adət-ənənələri ilə tanış olmaq üçün gözəl fürsət yarada bilər.

Tamilla MƏMMƏDOVA