Azərbaycandan Rusiyaya bitkiçilik məhsullarının fasiləsiz tədarükünü təmin etmək üçün Xudat nəqliyyat-logistika qovşağının ərazisində karantin fitosanitar nəzarətinin optimallaşdırılması imkanları araşdırılır.

"vergiler.az" Rusiyanın Baytarlıq və Fitosanitar Nəzarəti üzrə Federal Xidmətinə ("Rosselxoznadzor") istinadən xəbər verir ki, bu barədə “Rosselxoznadzor”un rəhbəri Sergey Dankvert ilə Azərbaycan Qida Təhlükəsizliyi Agentliyinin rəhbəri Qoşqar Təhməzli arasında keçirilən telefon danışıqlarında bildirilib.

Qeyd olunub ki, Azərbaycan Rusiyaya meyvə-tərəvəz ixracatında liderlərdən biri olmaqda davam edir. Öz növbəsində Rusiya bu il Azərbaycana diri heyvan, quş əti, kartof, buğda unu və buğda tədarükünü artırıb.

Tərəflər Azərbaycanla ticarətdə maraqlı olan Rusiya şirkətlərində yoxlamaların aparılması prosedurunu müzakirə ediblər.

Bununla yanaşı, müxtəlif heyvandarlıq məhsulları, o cümlədən balıq yemi istehsal edən Azərbaycan müəssisələrinin ixrac imkanlarının genişləndirilməsi məsələsinə toxunulub.