Özəl sektorun uğurlu inkişafı siyasəti Prezident İlham Əliyevin rəhbərliyi ilə qlobal çağırışlar fonunda yeni nailiyyətlərlə davam etdirilir. Dayanıqlı inkişaf edən Azərbaycanda özəl sektorun güclənməsi sosial-iqtisadi inkişaf strategiyasının daim mərkəzindədir və bu sahədə sistemli işlər həyata keçirilir.

Bu sözləri iqtisadiyyat naziri Mikayıl Cabbarov “Heydər Əliyev və Azərbaycan sahibkarlığının inkişafı” mövzusunda konfransda bildirib.

M.Cabbarov Azərbaycan iqtisadiyyatının inkişaf dinamikasında müsbət meyillərin getdikcə artdığını vurğulayıb: “2022-ci ildə ÜDM 4,6 faiz artaraq 133,8 milyard manat, qeyri-neft/qaz sektorunda isə 9,1 faiz artaraq 69,8 milyard manat təşkil edib. ÜDM-in tərkibində qeyri-neft/qaz sektoru üzrə bir sıra sahələrdə əhəmiyyətli artım qeydə alınıb”.

Nazirin sözlərinə görə, 2022-ci il ərzində xarici ticarət dövriyyəmiz 55 faizdən çox artıb və 52,6 milyard ABŞ dolları, ixrac isə 71,8 faiz artaraq 38 milyard dollardan çox olub. İqtisadiyyatın şaxələndirilməsi və ixrac potensialının yüksəldilməsi istiqamətində tədbirlər nəticəsində 2022-ci il ərzində qeyri-neft məhsullarının ixracı 12,3 faiz artaraq 3 milyard dollardan çox olub.