İqtisadiyyat Nazirliyi yanında Əmlak Məsələləri Dövlət Xidməti tərəfindən martın 28-də növbəti hərrac keçirilib.

Xidmətdən “vergiler.az”a verilən məlumata görə, hərraca həm iri, həm də kiçik həcmli sərmayə tələb edən müxtəlif çeşidli obyektlər çıxarılıb. Budəfəki hərracda 4 obyekt və 1 yarımçıq tikili özəlləşdirilib.

Hərracda əmlaklardan birinin qiyməti 2 dəfə çox artıb. Belə ki, Qazax rayonu, Hüseynbəyli kəndində yerləşən mağazanın ilkin start qiyməti 9 min manat olsa da, son təklif 18 500 manatadək yüksəlib.

Mağazanın ümumi faydalı sahəsi 97 kvadratmetr, torpaq sahəsi isə 170 kvadratmetrdir. Bu əmlak torpaq sahəsi ilə birgə özəlləşdirilib.

Hərracda özəlləşdirilən yarımçıq tikili Gəncə şəhərində yerləşir. Torpaq sahəsi 4521 kvadratmetr olan əmlak 110 000 manata satılıb.

Satılan əmlaklar üzrə dövlət büdcəsinə 164 750 manat vəsaitin ödənilməsi nəzərdə tutulur.

Özəlləşdirilən dövlət əmlaklarının siyahısı ilə Xidmətin rəsmi səhifəsindən (https://clck.ru/33ihWp) tanış olmaq olar.

Növbəti hərraclar 4, 11, 12, 18 aprel tarixlərində keçiriləcək. Hərraclara 88 əmlak çıxarılacaq.