Prezident İlham Əliyev Türk Dövlətləri Təşkilatının IX Zirvə görüşündə iştirak etmək üçün dünən Özbəkistana səfərə gedib. Dövlət başçısı İlham Əliyevi və birinci xanım Mehriban Əliyevanı Özbəkistanın Baş naziri Abdulla Aripov və digər rəsmi şəxslər qarşılayıblar.

Sosial şəbəkədə səfər barədə fikirlərini bölüşən millət vəkili Vüqar Bayramov bildirib ki, son dövrlər Türk dövlətləri arasında strateji əlaqələrin sürətlə inkişafı özünü iqtisadi münasibətlərdə də göstərməkdədir: “Bu ilin ilk 7 ayında Azərbaycanın Türk dövlətləri ilə ticarət dövriyyəsi 3 milyard 991 milyon dollar olub. Həmin müddətdə Türkiyə ilə 3 milyard 376 milyon, Qazaxıstan ilə 350,1 milyon, Türkmənistan ilə 156,9 milyon, Özbəkistan ilə 103,7 milyon, Qırğızstan ilə isə 4.5 milyon dollar dövriyyə qeydə alınıb. Ötən ilin ilk 7 ayında isə ölkəmizin Türk dövlətləri ilə ticarət dövriyyəsinin həcmi 2 milyard 662 milyon dollar olmuşdu: dövriyyənin həcmi Türkiyə ilə 2 milyard 502 milyon, Qazaxıstan ilə 58,4 milyon, Özbəkistan 54,2 milyon, Türkmənistan ilə 41,6 milyon, Qırğızıstan ilə 5,7 milyon dollar olmuşdu. Bu isə o deməkdir ki, bu ilin ilk 7 ayında Azərbaycanın Türk dövlətləri ilə ticarət dövriyyəsi ötən ilin uyğun dövrü ilə müqayisədə 50 faiz artıb. Kifayət qədər ciddi artımdır. Türk dövlətləri yeni inkişaf və əməkdaşlıq mərhələsinə qədəm qoyur. İnvestisiya fondlarının yaradılması, strateji qərarlar, birgə layihələr Türk dünyasını daha da yaxınlaşdıracaq və bütövləşdirəcək”.