İqtisadiyyat Nazirliyi yanında Dövlət Vergi Xidməti (DVX) tərəfindən iqtisadiyyatın müxtəlif sahələrində fəaliyyət göstərən sahibkarların qarşılaşdıqları çətinliklərin öyrənilməsi və biznes mühitinin təkmilləşdirilməsi məqsədilə assosiasiyalarla keçirilən görüşlər davam etdirilir. Növbəti belə görüş DVX-nin Vergi siyasəti baş idarəsi ilə Azərbaycan Sığortaçılar Assosiasiyasının üzvləri arasında baş tutub.

Görüş zamanı Dövlət Vergi Xidməti ilə Azərbaycan Sığortaçılar Assosiasiyası arasında əvvəlki müzakirələr çərçivəsində təqdim edilən təkliflərin vergi qanunvericiliyinə dəyişikliklər zamanı nəzərə alınması ilə bağlı ətraflı məlumat verilib. Assosiasiya nümayəndələri tərəfindən bu formatda keçirilən görüşlərin biznes mühitində mövcud çağırışların operativ şəkildə müəyyənləşdirilməsi və effektiv həll mexanizmlərinin formalaşdırılması baxımından mühüm əhəmiyyət kəsb etdiyi vurğulanıb.

Müzakirələr zamanı assosiasiya nümayəndələri sığorta sektorunda real praktiki əməliyyatların aparılması prosesində qarşılaşdıqları çətinlikləri və sahənin inkişafı üçün əhəmiyyətli hesab etdikləri təklifləri səsləndiriblər. Görüşdə sığorta təşkilatları tərəfindən təqdim edilən elektron qaimə-fakturaların tərtibi zamanı tətbiqi aktual hesab olunan texniki yeniliklər və sığortaçıların həyata keçirdikləri əməliyyatlar üzrə vergi qanunvericiliyi məsələləri geniş müzakirə edilib.

Yekunda dövlət - biznes əməkdaşlığının daha da inkişaf etdirilməsi və vergi qanunvericiliyinin təkmilləşdirilməsi istiqamətində sahibkarların rəy və təkliflərinin öyrənilməsi üçün görüşlərin davam etdiriləcəyi iştirakçıların diqqətinə çatdırılıb.