İqtisadiyyat Nazirliyi yanında Dövlət Vergi Xidmətinin Vergi ombudsmanı xidməti baş idarəsi tərəfindən Quba şəhərində sahibkarlarla görüş keçirilib.

Görüşdə 3 saylı Ərazi Vergilər İdarəsinin əhatə dairəsində fəaliyyət göstərən kiçik, orta və iri sahibkarlıq subyektlərinin nümayəndələri iştirak ediblər. Tədbirdə vergi qanunvericiliyi və inzibatçılığı ilə bağlı məsələlər müzakirə olunub, sahibkarların qarşılaşdıqları çətinliklər, təklif və təşəbbüsləri dinlənilib.

Vergi ombudsmanı xidməti baş idarəsinin rəisi Arif Quliyev xidmətin fəaliyyəti, əsas istiqamətləri və vergi ödəyicilərinin hüquqlarının müdafiəsi sahəsində həyata keçirilən tədbirlər barədə məlumat verib. Bildirilib ki, Vergi ombudsmanı xidməti baş idarəsinin yaradılmasında əsas məqsəd vergi ödəyicilərinin hüquqlarının qorunması, onların müraciətlərinə çevik baxılması və mümkün problemlərin qarşısının əvvəlcədən alınmasıdır.

Görüşdə vergi ödəyicilərinin Vergi ombudsmanı xidmətinə müraciət edə biləcəyi hallar barədə məlumat verilib. Həmçinin Dövlət Vergi Xidmətinin internet saytında yaradılmış “Vergi ombudsmanı” bölməsi təqdim olunub.

Sahibkarların sualları cavablandırılıb, onların vergi qanunvericiliyi və inzibatçılığı ilə bağlı fikir və təklifləri dinlənilib. Görüş zamanı vergi orqanlarına edilən müraciətlərlə bağlı real vaxt rejimində sorğu keçirilib.

Vergi ombudsmanı xidməti baş idarəsi tərəfindən sahibkarlarla bu istiqamətdə görüşlərin keçirilməsi davam etdiriləcək.