İqtisadiyyat Nazirliyi yanında Dövlət Vergi Xidməti (DVX) tərəfindən iqtisadiyyatın müxtəlif sahələrində fəaliyyət göstərən sahibkarların qarşılaşdıqları çətinliklərin öyrənilməsi və biznes mühitinin təkmilləşdirilməsi məqsədilə keçirilən silsilə görüşlər davam etdirilir. Növbəti belə görüş DVX-nin Vergi siyasəti baş idarəsi ilə “Startap” şəhadətnaməsi almış vergi ödəyiciləri arasında keçirilib.

Tədbirdə bildirilib ki, sahibkarlarla görüşlər biznes mühitində mövcud çağırışların operativ şəkildə müəyyənləşdirilməsi və effektiv həll mexanizmlərinin formalaşdırılması baxımından mühüm əhəmiyyət kəsb edir.

Görüş zamanı vergi ödəyiciləri bu sahədə mövcud vəziyyət və inkişaf perspektivləri barədə məlumat verib, ekosistemin inkişafı üçün vacib hesab etdikləri təklifləri səsləndiriblər. Müzakirələr zamanı “Startap” şəhadətnaməsi üzrə tətbiq olunan güzəşt müddətləri, maliyyələşdirmə imkanlarının genişləndirilməsi, eləcə də innovativ təşəbbüslərə əlavə dəstək mexanizmləri diqqət mərkəzində olub.

Yekunda dövlət - biznes əməkdaşlığının daha da inkişaf etdirilməsi və vergi qanunvericiliyinin təkmilləşdirilməsi istiqamətində sahibkarların rəy və təkliflərinin öyrənilməsi üçün görüşlərin davam etdiriləcəyi iştirakçıların diqqətinə çatdırılıb.