Dövlət Vergi Xidməti tələbə və məzunlarla karyera imkanlarını bölüşüb

İqtisadiyyat Nazirliyi yanında Dövlət Vergi Xidməti (DVX) Azərbaycan Dövlət İqtisad Universitetində (UNEC) təşkil olunan 17-ci Karyera Yarmarkasında iştirak edib. Tədbir işəgötürənlərlə gənclər arasında əlaqələrin gücləndirilməsi, onların məşğulluğunun artırılması və peşəkar inkişafının dəstəklənməsinə yönəlib.

Yarmarka çərçivəsində DVX-nin əməkdaşları dövlət vergi orqanlarına işə qəbul prosesi, eləcə də qurum daxilində karyera və inkişaf imkanları barədə gəncləri maraqlandıran məsələlər ətrafında məlumat verib, sualları cavablandırıblar.

Gənclərin xüsusi maraq göstərdiyi istiqamətlərdən biri də DVX-nin Yay Təcrübə Proqramı olub. Tələbələrə proqram çərçivəsində əldə olunacaq praktiki bilik və bacarıqlar, real iş mühiti ilə tanışlıq və peşəkar inkişaf imkanları barədə məlumat verilib.