İqtisadiyyat Nazirliyi yanında Dövlət Vergi Xidmətində rəhbər heyətin liderlik və idarəetmə bacarıqlarının inkişaf etdirilməsi, fərdi potensialının üzə çıxarılması və dəyər əsaslı idarəetmə prinsiplərinin təşviqi məqsədilə “Kouçinq proqramı”na başlanılıb.

Proqram fərdi və qrup kouçinq sessiyalarını əhatə edir. Fərdi sessiyalar rəhbərlərin peşəkar və şəxsi inkişaf hədəflərinə fokuslanaraq onların güclü tərəflərini daha yaxından qiymətləndirməsinə, inkişaf istiqamətlərini müəyyən etməsinə və idarəetmə bacarıqlarını təkmilləşdirməsinə dəstək verəcək. Qrup sessiyaları isə rəhbər heyət arasında təcrübə mübadiləsinin aparılmasına, ortaq idarəetmə çağırışlarının müzakirəsinə və komanda ilə effektiv əməkdaşlıq bacarıqlarının inkişafına imkan yaradacaq.

Proqram çərçivəsində qrup kouçinq sessiyalarına ümumilikdə 53 nəfər rəhbər vəzifəli şəxsin cəlb olunması nəzərdə tutulur. Qruplar struktur bölmələrin funksional təyinatı və fəaliyyət istiqamətləri nəzərə alınmaqla formalaşdırılıb.

Kouçinq proqramının rəhbər heyətdə daha çevik, nəticə və insan yönümlü idarəetmə yanaşmasının formalaşdırılmasına töhfə verəcəyi gözlənilir.