Azərbaycan Respublikası Hesablama Palatası ilə İqtisadiyyat Nazirliyi yanında Dövlət Vergi Xidməti (DVX) arasında imzalanmış əməkdaşlıq haqqında Memorandum çərçivəsində DVX-nin audit strukturlarında fəaliyyət göstərən əməkdaşlar üçün “Dövlət auditi” mövzusunda təlim keçirilib.

Hesablama Palatasının Tədris Mərkəzinin rəhbəri Ramal Əzizov və DVX Tədris Mərkəzinin rəisinin müavini Mirəli Kazımov çıxış edərək qurumlararası əməkdaşlığın əhəmiyyətini vurğulayıblar. Qeyd olunub ki, Memorandum çərçivəsində təsdiq edilmiş ilkin fəaliyyət planına uyğun olaraq dövlət maliyyə nəzarəti sahəsində bilik və bacarıqların artırılması prioritet istiqamətlərdən biri kimi müəyyənləşdirilib.

Hesablama Palatasının mütəxəssisləri tərəfindən keçirilən təlim çərçivəsində dövlət büdcəsinin icrası, maliyyə resurslarının səmərəli idarə olunması, risk əsaslı audit yanaşmaları, eləcə də şəffaflıq və hesabatlılıq prinsiplərinə dair təqdimatlar edilib.

Təlim interaktiv müzakirələr və sual-cavab sessiyaları ilə davam edib.