İqtisadiyyat Nazirliyi yanında Dövlət Vergi Xidmətində (DVX) 11 fevral – Vergi xidməti işçilərinin peşə bayramı münasibətilə təltif olunan əməkdaşlarla və gənc işçilərlə görüş keçirilib.

Tədbirdə mentorluq proqramına həsr olunmuş videoçarx nümayiş etdirilib. Sonra çıxış edən Xidmət rəisinin müşaviri, İnsan resursları baş idarəsinin rəisi Aytən Kərimova DVX-də gənc əməkdaşlar üçün tətbiq olunan mentorluq proqramı ilə bağlı ətraflı məlumat verib, proqramda fəal iştirak edən mentorlara təşəkkürünü bildirib. Baş idarə rəisi bu proqramın təşkilati dəyərlərin gənc əməkdaşlar arasında təşviqinə və daxili mədəniyyətin davamlılığının təmin olunmasına xidmət etdiyini vurğulayıb.

Tədbirdə çıxış edən DVX rəisi Orxan Nəzərli Xidmətin strateji prioritetləri və institusional inkişaf istiqamətləri barədə fikirlərini bölüşüb. DVX rəisi vergi orqanlarında peşəkarlıq ənənələrinin qorunmasının və biliklərin davamlı ötürülməsinin vacibliyini vurğulayıb. Qeyd edib ki, mentorluq proqramı gənc əməkdaşların potensialının üzə çıxarılması və təşkilati dəyərlərin gündəlik fəaliyyətə inteqrasiyası baxımından mühüm rol oynayır.

Görüş çərçivəsində peşə bayramı münasibətilə fərqlənmiş əməkdaşlara təltiflər təqdim olunub, xatirə şəkilləri çəkilib.