İqtisadiyyat Nazirliyi yanında Dövlət Vergi Xidmətində (DVX) “Caspian Energy Club”un və Azərbaycan Nəqliyyat Ekspeditor Şirkətləri Assosiasiyasının rəhbərləri, eləcə də nəqliyyat-ekspedisiya sahəsində fəaliyyət göstərən sahibkarlarla görüş keçirilib. Görüşdə İqtisadiyyat Nazirliyinin nümayəndələri də iştirak ediblər.

DVX-nin Vergi siyasəti baş idarəsinin rəisi Nicat İmanov biznes nümayəndələri tərəfindən nəqliyyat-ekspedisiya sahəsində verilmiş təkliflərlə bağlı görülmüş işlər barədə məlumat verib.

Görüş zamanı “Nəqliyyat-ekspedisiya fəaliyyəti haqqında” yeni qəbul olunmuş Qanunun, habelə beynəlxalq yük daşımaları ilə bağlı vergi qanunvericiliyinə edilmiş dəyişikliklərin tətbiqi mexanizmləri geniş müzakirə olunub. İştirakçıların vergi qanunvericiliyinin tətbiqi və praktiki məsələlərə dair sualları cavablandırılıb, mövcud çətinliklər və onların aradan qaldırılması yolları ətrafında fikir mübadiləsi aparılıb.

Dövlət - biznes əməkdaşlığının daha da inkişaf etdirilməsi və vergi qanunvericiliyinin təkmilləşdirilməsi istiqamətində sahibkarların rəy və təkliflərinin öyrənilməsi üçün görüşlərin davam etdiriləcəyi iştirakçıların diqqətinə çatdırılıb.