İqtisadiyyat Nazirliyi yanında Dövlət Vergi Xidmətinin 9 saylı Ərazi Vergilər İdarəsinin fəaliyyət dairəsinə daxil olan Göyçay, Ağdaş, Ucar, Zərdab və Kürdəmir rayonlarında sahibkarlıq subyektlərinin nümayəndələri ilə maarifləndirici görüşlər keçirilib.

Görüşlər zamanı iştirakçılara vergi qanunvericiliyində və sosial sığorta sahəsində tətbiq edilən son yeniliklər, qanunvericiliyə edilmiş dəyişikliklərin əsas istiqamətləri barədə ətraflı məlumat verilib. Eyni zamanda, vergi ödəyicilərinin hüquq və vəzifələri, vergi inzibatçılığı sahəsində həyata keçirilən tədbirlər diqqətə çatdırılıb.

Tədbirlər çərçivəsində investisiya mühitinin və sahibkarlıq fəaliyyətinin stimullaşdırılması, büdcə daxilolmalarının tənzimlənməsi, eləcə də vergi nəzarətinin gücləndirilməsi ilə bağlı məsələlər müzakirə olunub. Bundan başqa, “Sosial sığorta haqqında”, “Tibbi sığorta haqqında” və “Nağdsız hesablaşmalar haqqında” qanunlara edilmiş dəyişikliklər barədə iştirakçılara geniş izahatlar verilib.

Sahibkarların sualları cavablandırılıb, səsləndirilən təkliflər qeydə alınıb.