İqtisadiyyat Nazirliyi yanında Dövlət Vergi Xidmətində (DVX) maliyyə institutları üçün təlim təşkil olunub. Təlim Ümumi Hesabatlılıq Standartının (CRS) və Xarici Hesablar üzrə Vergi Əməletməsi Aktının (FATCA) tətbiqinə dair məsələlərlə bağlı olub.

DVX-nin Beynəlxalq vergitutma və vergi monitorinqi baş idarəsinin təşkilatçılığı ilə keçirilən tədbirin məqsədi maliyyə institutlarının CRS və FATCA üzrə hesabatlılıq öhdəlikləri barədə məlumatlığını artırmaq, mövcud qanunvericilik tələblərini izah etmək və praktiki bacarıqlarını gücləndirmək olub. Eyni zamanda, beynəlxalq standartların ölkəmizdə tətbiqinin öhdəliklərin yerinə yetirilməsi və Azərbaycanın nüfuzunun artırılması baxımından prioritet istiqamətlərdən biri olduğu vurğulanıb, bu sahədə maliyyə institutları ilə səmərəli əməkdaşlığın əhəmiyyəti diqqətə çatdırılıb.

Təlim çərçivəsində CRS və FATCA standartlarının əsas prinsipləri, müştərilərin vergi rezidentliyinin müəyyənləşdirilməsi, məlumatların toplanması, yoxlanılması və vergi orqanına təqdim olunması prosedurları, eləcə də beynəlxalq avtomatik məlumat mübadiləsi mexanizmləri ətraflı izah edilib. Bununla yanaşı, maliyyə institutlarının üzləşə biləcəyi risklər, hesabatlarda müşahidə olunan uyğunsuzluqlar və onların aradan qaldırılması yolları diqqətə çatdırılıb.

Təlim zamanı tədbir iştirakçılarının suallar ətraflı cavablandırılıb, mövzu ilə bağlı aktual məsələlər ətrafında fikir mübadiləsi aparılıb.