İqtisadiyyat Nazirliyi yanında Dövlət Vergi Xidməti (DVX) 2026-cı ilin büdcə-vergi siyasəti çərçivəsində vergi və sosial sığorta qanunvericiliyində nəzərdə tutulan dəyişikliklərlə bağlı sahibkar birlikləri və assosiasiyaları, ictimai birliklər, ticarət palataları, eləcə də digər vergi ödəyici qruplarının məlumatlandırılması məqsədilə mütəmadi görüşlər keçirir.

Bu çərçivədə DVX-nin Vergi siyasəti baş idarəsinin əməkdaşları “Deloitte & Touche” MMC tərəfindən keçirilmiş İllik Vergi Konfransında, Alman – Azərbaycan Xarici Ticarət Palatasının təşkilatçılığı ilə təşkil edilmiş müzakirə sessiyasında, Britaniya – Azərbaycan Ticarət Palatasının (BCCA) təşkilatçılığı ilə keçirilmiş informasiya sessiyasında və Azərbaycanda Amerika Ticarət Palatası (AMCHAM) tərəfindən təşkil olunmuş görüşdə iştirak ediblər. Tədbirlər zamanı DVX nümayəndələri tərəfindən növbəti il üçün vergi qanunvericiliyində nəzərdə tutulan dəyişikliklərə dair təqdimatlar nümayiş etdirilib, biznes nümayəndələrini maraqlandıran suallar cavablandırılıb.