Vergi Məcəlləsinə dəyişikliklərin əsas istiqamətlərindən birini sahibkarların vergi yükünün optimallaşdırılması və biznes fəaliyyətinə təşviqlərin verilməsi təşkil edir. Belə ki, 2026-cı ilin yanvarın 1-dən etibarən 10 il müddətində mənfəət (gəlir), əmlak, torpaq, əlavə dəyər (sənaye və texnologiya parklarının, sənaye məhəllələrinin rezidentləri və investisiya təşviqi sənədi alan şəxslərin idxal əməliyyatlarına münasibətdə) və sadələşdirilmiş vergi üzrə işğaldan azad edilmiş ərazilər üzrə tətbiq olunan vergi güzəştlərinin Naxçıvan Muxtar Respublikasında da tətbiqi nəzərdə tutulur.

Dəyişiklik nəticəsində Naxçıvan MR-də iqtisadiyyatın inkişafının davamlılığının təmin edilməsi, əlverişli biznes mühitinin yaradılması, sahibkarlıq mühitinin canlanması, ölkə iqtisadiyyatına inteqrasiyası, əhalinin məşğulluğunun və maddi rifahının yüksəldilməsi hədəflənir.

Bu dəyişikliklərin sahibkarların maliyyə yükünü azaldacağı, yeni iş yerlərinin yaradılmasına şərait yaradacağı və iqtisadi aktivliyi artıracağı gözlənilir. Nəticədə, həm sahibkarlar, həm də bölgə əhalisi üçün daha əlverişli iqtisadi mühit formalaşacaq.