DVX-nin rəis müavini Samirə Musayeva "Women's Entrepreneurship Summit 2025" tədbirində çıxış edib
Azərbaycan HR İnsitutunun və Qadın Sahibkarlığının İnkişafı Assosiasiyasının təşkilatçılığı ilə "Women's Entrepreneurship Summit 2025" tədbiri keçirilib. İqtisadiyyat Nazirliyi yanında Dövlət Vergi Xidmətinin rəis müavini Samirə Musayeva Sammitin “Sərhədləri aşaraq iz qoymaq: Qadınlar liderliyi və sahibkarlığı yenidən yazır” adlı sessiyasında çıxış edib.
Samirə Musayeva bildirib ki, son illər qadınların iqtisadi fəallığının artması, qadın sahibkarların biznesə və maliyyə resurslarına çıxış imkanlarının yaxşılaşdırılması, təlim və mentorluq proqramlarının genişləndirilməsi ölkəmizdə dövlət siyasətinin prioritetlərindən biridir. Sahibkarlıqla məşğul olanların xüsusi çəkisində qadınların payının artmasında onlara bizneslərinin formalaşdırılması və idarə olunması üçün dəstək göstərilməsi xüsusi rol oynayır. Bu gün ölkədə fərdi sahibkar kimi qeydiyyatda olan qadınların sayı 341,7 minə yaxındır. Təsisçisi qadın olan kommersiya hüquqi şəxslərin sayı 32 minə qədər, rəhbəri qadın olan kommersiya qurumlarının sayı isə 27,5 mindir.
DVX-nin rəis müavini bildirib ki, bu gün dövlət idarəçiliyində və özəl sektorda qadınların rəhbər vəzifələrə daha geniş çıxışı təmin olunur. Bu, həm də idarəetmənin keyfiyyətinin yüksəldilməsi baxımından mühüm amildir. Qadınlar biznes mühitində davamlı və keyfiyyətli inkişaf modeli formalaşdırırlar, innovativ ideyaları, idarəetmə bacarıqları və sosial məsuliyyət anlayışı ilə ölkə iqtisadiyyatına böyük dəyər qatırlar.
Gender bərabərliyi prinsiplərinə toxunan DVX-nin rəis müavini bildirib ki, qadınların idarəetmə və qərarvermə səviyyəsində təmsilçiliyinin artırılması yalnız özəl sektordan deyil, həm də dövlət qurumlarından gözlənilir. Samirə Musayeva DVX-də qadınların idarəetmədə təmsil olunması, onların peşəkar potensialının üzə çıxarılması və rəhbər vəzifələrə yüksəlməsi məqsədilə sistemli yanaşmalar tətbiq olunduğunu vurğulayıb.
Sonra Sammit iştirakçılarının çoxsaylı sualları cavablandırılıb.
