DVX nümayəndələri beynəlxalq təlimdə iştirak ediblər

İqtisadiyyat Nazirliyi yanında Dövlət Vergi Xidmətinin (DVX) nümayəndələri Qazaxıstan Respublikasının Almatı şəhərində təşkil edilmiş “Vergi güzəştlərinin idarə edilməsi” təlimində iştirak ediblər. Beynəlxalq Valyuta Fondunun Qafqaz, Mərkəzi Asiya və Monqolustan üzrə Regional Potensialın İnkişafı Mərkəzi tərəfindən təşkil edilmiş təlimdə ölkəmizi DVX-nin Vergi siyasəti baş idarəsinin baş hüquqşünası Gülnarə Pənahova, İqtisadi təhlil və proqnozların icrasına nəzarət baş idarəsinin baş dövlət vergi müfəttişi Qoşqar Qocayev və Tədris Mərkəzinin Elm, innovasiya vəməkdaşlıq şöbəsinin rəisi Nazim Əliyev təmsil ediblər.

İştirakçı ölkələrdə vergi güzəştlərinin idarə olunması bacarıqlarının, institusional potensialın və vergi şəffaflığının artırılması, fiskal davamlılığın stimullaşdırılması və regional əməkdaşlığın təşviqi məqsədilə təşkil edilmiş təlim beynəlxalq ekspertlər tərəfindən keçirilib.

Təlimdə ölkələrin vergi güzəştlərinin idarə olunması sahəsində potensialının gücləndirilməsi, beynəlxalq təcrübədə mövcud mexanizmlər, qiymətləndirmə metodologiyaları, fiskal şəffaflığın artırılmasına dəstək və perspektivlər barədə məlumat verilib. Tədbir çərçivəsində vergi güzəştlərinin təsnifatı, fiskal təsirinin ölçülməsi metodologiyaları, şəffaf uçotu, hesabatlılığı və iqtisadi səmərəliliyi kimi mövzular diqqətdə saxlanılıb. Beynəlxalq praktikadan nümunələr təqdim edilib və iştirakçı ölkələrin təqdimatları dinlənilib.