Dövlət Vergi Xidməti internat məktəbinin şagirdləri üçün əyləncəli tədbir təşkil edib
İqtisadiyyat Nazirliyi yanında Dövlət Vergi Xidməti (DVX) tərəfindən Bakı şəhərində yerləşən uşaq əyləncə mərkəzlərindən birində 11 nömrəli İnteqrasiya təlimli internat məktəbində təhsil alan 100-ə yaxın şagird üçün əyləncəli proqram təşkil olunub. Proqram 1 İyun – Uşaqların Beynəlxalq Müdafiəsi Günü münasibətilə DVX əməkdaşlarının övladlarının iştirakı ilə təşkil edilmiş “Balaca Ulduzlar” adlı xeyriyyə yarmarkasında əldə olunmuş vəsait hesabına reallaşdırılıb.
Tədbir çərçivəsində uşaqlar üçün maraqlı şoular, “master-klass”lar, interaktiv oyunlar keçirilib, onlara müxtəlif attraksionlar və batutlarda əylənmək imkanı yaradılıb, nahar təşkil olunub. Yekunda şagirdlərə geyim dəstləri hədiyyə edilib.
DVX sosial məsuliyyət strategiyası çərçivəsində ictimaiyyət üçün faydalı təşəbbüslərin dəstəklənməsinə daim diqqətlə yanaşır, cəmiyyətin həssas təbəqələrini əhatə edən sosial layihələrin həyata keçirilməsində fəal tərəfdaş kimi iştirak edir. Bu tədbirin də başlıca məqsədi qayğıya daha çox ehtiyacı olan məktəblilərin cəmiyyətə inteqrasiyasına dəstək göstərməkdir.
