Avtomobil Dilerləri Assosiasiyası ilə görüş keçirilib
İqtisadiyyat Nazirliyi yanında Dövlət Vergi Xidməti ölkə iqtisadiyyatının müxtəlif sahələrində fəaliyyət göstərən sahibkarların vergi qanunvericiliyinin tətbiqi ilə bağlı qarşılaşdıqları çətinliklər və təkliflərinin öyrənilməsi istiqamətində əməkdaşlığı və görüşləri davam etdirir. Növbəti belə görüş Dövlət Vergi Xidmətinin Vergi siyasəti baş idarəsi, İqtisadi təhlil və proqnozların icrasına nəzarət baş idarəsi və avtomobil dilərlərinin nümayəndələrinin iştirakı ilə baş tutub.
Tədbirdə Azərbaycan Avtomobil Dilerləri Assosiasiyası tərəfindən ölkədə avtomobil bazarının cari vəziyyəti barədə statistik məlumatlar səsləndirilib. Qanunvericlikdə tətbiq olunan yeni güzəşt mexanizmləri sayəsində son illər elektrik və hibrid mühərrikli avtomobillərin sayında artım olduğu diqqətə çatdırılıb. Görüş zamanı rəsmi dilerlərin avtomobil bazarında mövcud çətinlikləri müzakirə edilib, bu istiqamətdə Türkiyə, Qazaxıstan və digər ölkələrin təcrübələri qeyd olunub. Daha sonra kreditləşmə, nisyə qaydada satış və rəsmi dilerlər tərəfindən 2-ci əl avtomobillərin təkrar satışında yaranan ƏDV öhdəlikləri ətrafında məsələlərə toxunulub.
Dövlət Vergi Xidmətinin əməkdaşları tərəfindən vergi qanunvericiliyinin bəzi aspektəri izah olunub, iştirakçıların sualları cavablandırılıb, gələcəkdə belə görüşlərin davam etdirilməsinin zəruriliyi diqqətə çatdırılıb.
