İqtisadiyyat Nazirliyi yanında Dövlət Vergi Xidmətinin rəisi, Avropadaxili Vergi Administrasiyaları Təşkilatının (IOTA) prezidenti Orxan Nəzərli Almaniya Federal Maliyyə Nazirliyinin Vergi Direktoratlığının rəhbəri Nils Vayt ilə videoformatda görüş keçirib.

Görüşdə birgə fəaliyyətin inkişaf etdirilməsi üçün potensial imkanlar, əməkdaşlığın gücləndirilməsi və beynəlxalq əlaqələrin təşviqi barədə müzakirələr aparılıb. Tərəflər IOTA çərçivəsində tərəfdaşlığın şaxələndirilməsi məsələləri, ikitərəfli səviyyədə vergi sahəsində təcrübə mübadiləsi ilə bağlı fikirlərini bölüşüblər. Görüşdə IOTA-nın fəaliyyəti və son illər müşahidə edilən çağırışlar müzakirə olunub. Təşkilatın imkanlarının genişləndirilməsi, yeni üzvlərin cəlb edilməsi və maliyyə dayanıqlığının artırılması istiqamətində təkliflər nəzərdən keçirilib. Dövlət Vergi Xidmətinin IOTA-ya rəhbərliyi müddətində həyata keçirilən işlər, təşkilatın əməliyyat effektivliyini və üzv dövlətlər üçün cəlbediciliyini artırmaq məqsədi daşıyan strateji inkişaf planları və perspektivlər diqqətə çatdırılıb.

Görüşün davamında vergi sahəsində ikitərəfli əməkdaşlığın prioritetləri barədə fikir mübadiləsi aparılıb, innovasiyaların tətbiqi və vergi inzibatçılığının təkmilləşdirilməsi üzrə təcrübə mübadiləsinin əhəmiyyəti vurğulanıb.