Belçika Federal Dövlət Maliyyə Xidməti ilə əməkdaşlığın genişləndirilməsi imkanları müzakirə edilib

İqtisadiyyat Nazirliyi yanında Dövlət Vergi Xidmətinin rəisi, Avropadaxili Vergi Administrasiyaları Təşkilatının (IOTA) prezidenti Orxan Nəzərli Belçika Federal Dövlət Maliyyə Xidmətinin rəhbəri Filip Van de Velde ilə videoformatda görüş keçirib.

Görüşdə ikitərəfli əlaqələrin inkişaf etdirilməsinin prioritet istiqamətləri, tərəfdaşlığın gücləndirilməsi imkanları və beynəlxalq əməkdaşlığın təşviqi barədə müzakirələr aparılıb. Tərəflər IOTA çərçivəsində birgə fəaliyyətin şaxələndirilməsi məsələləri, eyni zamanda, ikitərəfli səviyyədə vergi sahəsində təcrübə mübadiləsi ilə bağlı fikirlərini bölüşüblər. Görüşdə IOTA-nın fəaliyyətinin genişləndirilməsi, yeni üzvlərin cəlb edilməsi və maliyyə dayanıqlılığının artırılması istiqamətində təkliflər nəzərdən keçirilib. Dövlət Vergi Xidmətinin Təşkilata rəhbərliyi müddətində həyata keçirilən işlər, strateji inkişaf planları və perspektivlər müzakirə edilib.

Görüşdə vergi sahəsində ikitərəfli əməkdaşlığın prioritetləri barədə fikir mübadiləsi aparılıb. Dayanıqlı iqtisadi fəaliyyətə dair təcrübələr, rəqəmsal vergi inzibatçılığı, qarşılıqlı məlumat mübadiləsi, vergidən yayınma halları ilə effektiv mübarizə, innovasiyaların tətbiqi və vergi inzibatçılığının təkmilləşdirilməsi kimi sahələrdə ortaq hədəflərə istiqamətlənmiş təşəbbüslər nəzərdən keçirilib.

Qeyd olunub ki, əlaqələrin möhkəmləndirilməsi hər iki ölkə üçün vergi sisteminin inkişafı, iqtisadi təcrübələrin və investisiya mühitinin təkmilləşdirilməsi baxımından mühüm əhəmiyyət daşıyır. Vergi inzibatçılığı sahəsində müştərək təşəbbüslərin artırılması üçün mövcud potensialdan istifadənin zəruriliyi vurğulanıb, qarşılıqlı maraq doğuran digər məsələlər barədə müzakirələr aparılıb.