İqtisadiyyat Nazirliyi yanında Dövlət Vergi Xidmətinin (DVX) rəisi Orxan Nəzərli “Uğur yolu” Karyera İnkişaf Proqramının qalibləri ilə görüşüb. “vergiler.az” xəbər verir ki, müsabiqənin qalibləri ilə qeyri-rəsmi formatda söhbət edən DVX rəisi “Uğur yolu”nun mühüm bir platforma olduğunu, bu müsabiqənin intellektual səviyyəsi və idarəçilik keyfiyyətləri yüksək olan əməkdaşların müəyyənləşdirilməsi, onların peşə hazırlığının dəstəklənməsi, yeni nəsil idarəçilərin hazırlanması və ehtiyat kadrlar bazasının formalaşdırılmasına xidmət etdiyini bildirib.

DVX-nin insan kapitalının formalaşdırılmasına xüsusi əhəmiyyət verdiyini vurğulayan O.Nəzərli hər bir təşkilatın müvəffəqiyyətinin, ilk növbədə, onun kadr potensialı və insan resurslarının keyfiyyətindən birbaşa asılı olduğunu, peşəkar komandanı islahatların və uğurun açarı hesab etdiyini vurğulayıb.

O.Nəzərli həyata keçirilən islahatların ölkəmizin iqtisadi inkişafında rolu barədə danışıb, idarəçilik bacarıqlarının inkişafı, peşəkar yanaşma tərzinin formalaşması, strateji və taktiki planlaşdırmanın aparılması ilə bağlı fikirlərini gənclərlə bölüşüb.

Görüşdə İqtisadiyyat Nazirliyinin və DVX-nin insan resursları ilə bağlı strukturlarının rəhbərliyi də iştirak ediblər. Tədbirin sonunda qaliblərə liderlik və idarəetmə strategiyası ilə bağlı kitablar hədiyyə edilib.