İşçinin Bakıdan Sumqayıta səfər etməsi ezamiyyə hesab edilir?

Təcrübədə tez-tez rast gəlinən suallardan biri də işçinin ezamiyyətə göndərilməsi zamanı məsafənin müəyyənləşdirilməsidir. Misal üçün, işəgötürən işçini Bakı şəhərindən Sumqayıt şəhərinə ezamiyyətə göndərə bilərmi? Qaydalarda ezamiyyətlə bağlı məsafə kilometrlə qeyd edilməsə də, işəgötürənlər üçün qeyd edilən suala aydınlıq gətirilməsi üçün maddə var.

Qaydaların “Respublika ərazisi daxilində ezamiyyələr” bölməsinin 3-cü hissəsinin ikinci hissəsinə əsasən, işçinin hər gün ezam olunma yerindən özünün daimi yaşayış yerinə qayıda bilməsi məsələsi hər bir konkret halda məsafənin uzaqlığı, nəqliyyat əlaqəsinin şəraiti, yerinə yetirilən tapşırığın xarakteri, həmçinin də işçiyə istirahət üçün şərait yaradılmasının vacibliyi nəzərə alınmaqla, ezam olunan işçinin işlədiyi təşkilatın rəhbəri tərəfindən həll edilir.

Maddədən də göründüyü kimi, ezamiyyə zamanı məsafənin uzaqlığının müəyyən edilməsi ezam olunan işçinin işlədiyi təşkilatın rəhbərinin səlahiyyətinə buraxılıb. İşəgötürən hesab edirsə ki, işçinin tapşırığı həyata keçirməsi üçün Sumqayıt şəhərində gecələməsinə ehtiyac var, o zaman həmin səfəri ezamiyyət kimi rəsmiləşdirə bilər.

Misal. Bakı şəhərində yerləşən işəgötürən qərar verir ki, Sumqayıt şəhərində keçiriləcək sərgidə iştirak etmək üçün işçilər 3 günlük ezam olunsun. İşəgötürən hesab edir ki, 2 gün hər gün saat 9:00-dan 18:00-ə kimi keçiriləcək tədbirdə iştirak etmək üçün işçilərin hər gün Bakı şəhərinə gəlib-getməsi işçilərin istirahət rejiminin pozulmasına səbəb olacaq. O səbəbdən də, işəgötürən həmin işçilərin Sumqayıtda 2 gün qalmasına qərar verir.

Mənbə: mks.az