Prezident İlham Əliyevin tapşırıqları əsasında 2018-2023-cü illər ərzində 4 sosial islahat paketi icra olunub.

Bunu əmək və əhalinin sosial müdafiəsi nazirinin müavini Anar Kərimov Əmək və Əhalinin Sosial Müdafiəsi Nazirliyi tərəfindən 5 il ərzində görülən işlərə həsr olunmuş mətbuat konfransında deyib.

Onun sözlərinə görə, son beş ildə 4 milyondan çox vətəndaşı əhatə edən sosial islahatlar nəticəsində minimum aylıq əməkhaqqında 2,7 dəfə artım olub. Bildirib ki, minimum pensiya 2,5 dəfə, orta aylıq əməkhaqqı 65 faiz, median əməkhaqqı 2,1 dəfə artıb: “Əməkhaqqı fondunda 2,5 dəfə, orta aylıq pensiyada 2,1 dəfə, sosial müavinət və təqaüd ödənişlərində 5 dəfə, ünvanlı sosial yardımın orta aylıq məbləğində 2,5 dəfə artım baş verib. 10-dan çox yeni sosial ödəniş növü təsis olunaraq və sosial təminat sistemində bir sıra humanist yanaşmalar, güzəştlər tətbiq edilməklə bu sistemin əhatə dairəsi daha da genişləndirilib. Həmin 4 sosial islahat paketi üzrə əlavə olaraq ayrılan illik vəsait 6,8 milyard manata çatıb”. (AZƏRTAC)