Yeni pensiya islahatından 20 minə yaxın vətəndaş yararlanacaq

“Əmək pensiyaları haqqında” Qanuna dəyişiklik edilməsi ölkədə əhalinin sosial müfadiəsinin gücləndirilməsi sahəsində atılmış mühüm addımlardandır.

İqtisadçı ekspert Pərviz Heydərov bildirib ki, dəyişiklik nəticəsində bəzi vətəndaşların pensiya hüququ əldə etməsinin tezləşməsi, eləcə də aldıqları pensiyaların məbləğində müəyyən artımlar mümkün olacaq: “Bu istiqamətdə aparılan islahatlar çox müsbət nəticələr verib. Xüsusilə, 2019-cu ildə Vergi Məcəlləsinə edilmiş 300-ə yaxın dəyişikliklə paralel olaraq iqtisadiyyatda həyata keçirilən şəffaflaşma, leqallaşma və “kölgə iqtisadiyyatı”nın həcminin azalması nəticəsində sosial ayırmaların məbləği də əhəmiyyətli dərəcədə artdı. Dövlət Sosial Müdafiə Fonduna (DMSF) daxilolmaların həcmi çoxaldı və bu proses davam edir. Bu isə Fondun dövlət büdcəsindən asılılığınin azalmasına imkan yaradır. 2019-cu ildən başlayaraq həm DSMF-nin gəlirlərinin artmasının şahidi oluruq, həm də buna paralel olaraq dövlət büdcəsindən Fonda transfertlərin həcmi azaldığını görürük”.

P.Heydərov qeyd edib ki, bütün bunlar “Əmək pensiyaları haqqında” qanuna dəyişikliklər etməyə şərait yaradıb. Vətəndaşların pensiya hüququ əldə etmə şansları daha da genişlənib və aldıqları pensiya məbləğləri onların maddi təminatının yaxşılaşmasına getdikcə daha çox şərait yaratmağa hesablanıb. Yeni dəyişikliklərdən təxminən 20 min nəfərə yaxın vətəndaşımız yararlanacaq: “Bu dəyişikliklər qüvvəyə minəndən sonra bir çox vətəndaşların aldıqları əmək pensiyalarının məbləği artacaq, bir qrup insanın pensiya hüququ əldə etmək imkanları genişlənəcək. Çoxuşaqlı anaların, eləcə də zərərli sahələrdə çalışan şəxslərin pensiyaya daha tez çıxmasına imkan yaranacaq. Bu, çox mütərəqqi haldır və insanların sosial müdafiəsinin gücləndirilməsi baxımından müsbət dinamikadır”.