Antiinhisar və İstehlak Bazarına Nəzarət Dövlət Xidmətinin (AİBNDX) tabeliyində fəaliyyət göstərən Azərbaycan Akkreditasiya Mərkəzində (AzAK) 9 İyun – Ümumdünya Akkreditasiya Günü münasibətilə uyğunluğu qiymətləndirən qurumların və inspeksiya orqanları nümayəndələrinin iştirakı ilə tədbir təşkil olunub.

Xidmətdən “vergiler.az”a verilən məlumata görə, tədbirdə keyfiyyət infrastrukturunun inkişafı və akkreditasiya sisteminin təkmilləşdirilməsi istiqamətində atılan addımlar, uyğunluğu qiymətləndirən qurumların və inspeksiya orqanlarının fəaliyyətindəki prioritet vəzifələr müzakirə olunub. Həmçinin ölkədə sahə üzrə görülən işlərin müasir tələblərə uyğunlaşdırılmasının və xarici bazara çıxışın təmin edilməsi üçün beynəlxalq təşkilatlara üzvlüyün önəmi vurğulanıb.

Görüşdə AİBNDX-nin, Azərbaycan Metrologiya və Standartlaşdırma İnstitutlarının və İstehlak Mallarının Ekspertizası Mərkəzinin nümayəndələri də iştirak edib.

Sonda beynəlxalq təcrübənin öyrənilməsi istiqamətində AzAK tərəfindən birgə təlimlərin təşkili, uyğunluğu qiymətləndirən qurumların fəaliyyətinin təkmilləşdirilməsi və qarşılıqlı əməkdaşlıq məsələləri nəzərdən keçirilib.