Özbəkistan və Azərbaycan fındıq yetişdirilməsi sahəsində əməkdaşlıq edəcəklər
Özbəkistanın kənd təsərrüfatı naziri Aziz Voitov “Agrarco” şirkətinin direktoru Cavid Kazımovla görüşüb.
“Azərbaycan iqtisadiyyatı” Teleqram kanalı nazirliyin məlumatına istinadən xəbər verir ki, görüşün keçirilməsində məqsəd fındıq yetişdirilməsi, emalı və ümumilikdə bağçılığın inkişafı təcrübəsi ilə tanış olmaq olub. Tərəflər kənd təsərrüfatı sahəsində Özbəkistan-Azərbaycan əlaqələrinin təşviqi və inkişafı məsələlərinə toxunublar.
Danışıqlar zamanı Özbəkistanda fındıq yetişdirilməsi və emalı məsələləri müzakirə olunub. Fındıq yetişdirilməsi sahəsində təcrübə mübadiləsinin aparılması və mütəxəssislərin Azərbaycana göndərilməsi perspektivləri də nəzərdən keçirilib.
Görüşün yekununda tərəflər arasında fındıq yetişdirilməsi sahəsində Əməkdaşlıq Memorandumu imzalanıb.
