Almaniyanın Baş nazirinin müavini, maliyyə naziri Olaf Şolz və iqtisadiyyat və enerji naziri Peter Altmayer birgə mətbuat konfransı keçirib. Şolz 2008-ci il böhranından ibrət dərsləri çıxarıldığını bildirərək: "Bu böhranla mübarizə apara biləcək maliyyə gücümüz var. İqtisadiyyatı dəstəkləmək üçün əlimizdəki bütün imkanlardan istifadə edəcəyik", - deyib.

Son illərdə xərclərə diqqətlə yanaşması sayəsində Almaniya hökumətinin epidemiyaya görə xərcləri daha da artırmaq və vergi güzəştləri tətbiq etmək kimi zəruri tədbirləri görə biləcək vəziyyətdə olduğunu vurğulayan Şolz qeyd edib: "Ödəmələrdə güzəştlər də daxil olmaqla şirkətlərə vergi güzəştləri tətbiq edəcəyik. Limitsiz kredit proqramını həyata keçirəcəyik".

Mətbuat konfransında İqtisadiyyat və enerji naziri Peter Altmayer iqtisadiyyatı dəstəkləmək üçün Almaniya İnkişaf Bankında 500 milyard avroya yaxın vəsait olduğunu bildirib.