Türkiyədə kağız qaimə dövrü başa çatır
Türkiyə Cümhuriyyətinin Gəlirlər İdarəsinin qəbul etdiyi qaydalara uyğun olaraq, ümumi satış gəlirinin məbləğinə görə e-qaimə-faktura və e-arxiv qaimə-faktura sisteminə keçəcək müəssisələr üçün başlanğıc tarix 1 iyul 2023-cü il, eyni şirkətlərin elektron arxiv kitabı tətbiqinə keçid tarixi isə 1 yanvar 2024-cü il müəyyən edilib.
“Sabah” qəzetinin xəbərinə görə, Gəlirlər İdarəsi tərəfindən vergi prosedurlarında edilən dəyişikliklərlə e-qaimə-fakturadan istifadə, demək olar ki, bütün sektorlar üçün məcburi hala gətirilib. 1 iyul 2023-cü il tarixindən bir çox sektor bu əhatəyə daxil ediləcək. İlk növbədə, ümumi satış gəliri 2020 və 2021-ci illərdə 4 milyon lirə (287 min manat) və ondan yuxarı, 2022-ci il və sonrakı hesabat dövrlərində isə 3 milyon lirə (216 min manat) və yuxarı olan vergi ödəyiciləri məcburi şəkildə elektron qaimə-fakturaya keçəcəklər.
E-ticarət sahəsində fəaliyyət göstərən və ümumi satış gəliri 2022-ci il və ya sonrakı hesabat dövrlərində 500 min lirə (36 min manat) və daha çox olan vergi ödəyiciləri 1 iyul 2023-cü ilə qədər e-qaimə-fakturaya keçməlidirlər.
Texnologiyanın inkişafı və bir çox proseslərin rəqəmsallaşması ilə e-qaimə-fakturanın daha praktik olduğunu bildirən “KolayBi” şirkətinin rəhbəri Gökhan Boyana e-qaimə xidməti sayəsində yığım və ödəniş proseslərinin qısaldıldığını və nağd əməliyyatların sürətləndiyini qeyd edib.
Kağız hesab-fakturaların itirilməsi probleminin bu yolla tamamilə aradan qaldırıldığına diqqət çəkən G.Boyana deyib: “Beləliklə, hesab-fakturaların yaradılması, göndərilməsi və lazımi yerlərə çatdırılma müddəti minimuma endirildiyi üçün işin səmərəliliyi də avtomatik olaraq artır.
Bundan əlavə, e-qaimə-fakturaların istifadəsi ilə kağız faktura hazırlanması zamanı mürəkkəb, kağız və çap xərclərini aradan qaldırmış oluruq”.
