Dünya Bankı Gürcüstan iqtisadiyyatının artım proqnozunu yenidən qaldırıb

Dünya Bankı Gürcüstanın iqtisadi artımı ilə bağlı proqnozunu yenidən 5,5%-ə qaldırıb. Bankın Qafqaz ofisinin rəhbəri Sebastyan Molineus xatırladıb ki, bundan əvvəl regiondakı geosiyasi gərginliklə əlaqədar yaranmış qeyri-müəyyənlik səbəbindən Gürcüstanda iqtisadi artım proqnozu 2,5%-ə endirilmişdi: “Gürcüstan iqtisadiyyatı heyrətamiz möhkəmlik və güc nümayiş etdirdi və birinci rübdə nəzərəçarpan artıma nail oldu. Ona görə də biz indi inanırıq ki, Gürcüstan iqtisadiyyatı bu ilin əvvəlində proqnozlaşdırıldığı kimi 5,5% artacaq”, - DB nümayəndəsi bildirib.

Qeyd edək ki, 2022-ci ilin yanvar-aprel aylarında Gürcüstanda ümumi daxili məhsul artımı ötən ilin eyni dövründəki 8,1%-ə qarşı 10,8% olub. Artım daha çox nəqliyyat, mehmanxana və restoran biznesi, enerji və istilik təchizatı, maliyyə və sığorta, incəsənət, əyləncə və istirahət, tikinti, eləcə də mədənçıxarma sənayesi sahələrində müşahidə olunub.