Son vaxtlar dünya iqtisadiyyatının ən böyük başağrılarından biri ABŞ-ın Çindən idxal edilən mallara əlavə gömrük vergisi tətbiq etmək barədə planlarıdır. Bu məsələ yalnız iki ölkənin iqtisadi mənafelərinə deyil, qlobal səviyyədə iqtisadiyyata da təsir göstərir. Hazırda iki ölkə arasında vəziyyətin nizamlanması üçün müəyyən fasilələrlə danışıqlar aparılır. Yayılan son məlumatlara görə, ABŞ Prezidenti Donald Tramp öz ölkəsi ilə Çin arasındakı ticarət anlaşılmazlıqlarının həlli yolunun tapılması ilə bağlı görüşlərdə "yaxşı irəliləyiş" olduğu ilə əlaqədar Çindən idxal edilən mallara yüksək gömrük vergisi tariflərinin qüvvəyə minməsi üçün nəzərdə tutulan tarixi 60 gün geri çəkmək barədə düşünür.

"Bloomberg News" agentliyinin "mövzuya yaxın mənbələrə" istinadla yaydığı xəbərdə bildirilir ki, Tramp Çin hökuməti ilə ticarətə dair görüşmələr üçün daha çox vaxt qazana bilmək məqsədilə yüksək gömrük vergilərinin tətbiqinin 60 gün ləngidilməsi məsələsini nəzərdən keçirir.