28 Noyabr 2020

VERGİLƏR

SOSİAL-İQTİSADİ ONLAYN QƏZET

Yeni vergi rejimində sahibkarlar iqtisadi artımda daha fəal iştirak etmək imkanı qazanacaqlar

Millət vəkili Vüqar Bayramov Vergi Məcəlləsinə edilmiş dəyişikliklərlə bağlı açıqlamasında vergi güzəştlərinin tətbiqinin iqtisadiyyatın inkişafı baxımından çox vacib olduğunu vurğulayıb.

Əslində, bu, müvəqqəti tədbir kimi deyil, dövlətin sahibkarlara postpandemiya dövründə dəstəyi kimi xarakterizə olunmalıdır. Dövlət sahibkarlara yalnız güzəştli kreditlər və digər yardımlarla deyil, eləcə də təşviq paketi olaraq vergi dərəcələrinin endirilməsi ilə dəstək olur. Bu da, onların xərclərinin azaldılması və investisiya imkanlarının genişləndirilməsi baxımından vacibdir. Yeni vergi rejimində sahibkarlar daha az vergi ödəməklə xərclərinə qənaət edə biləcəklər.

Vergi Məcəlləsinə edilən son dəyişikliklər postpandemiya dövründə iqtisadi aktivliyin daha tez bərpa edilməsi və ümumi daxili məhsuldakı (ÜDM) pozitiv trendin qorunub saxlanması üçün əhəmiyyətlidir. 2020-ci ilin ilk 4 ayının yekunlarına əsasən, Azərbaycan ÜDM-dəki artım tempini qoruyub saxlaya bilib: ÜDM-də 0,2 faiz, qeyri-neft sektorunda 16 faiz artım qeydə alınıb. Beləliklə, Azərbaycan pandemiya dövründə iqtisadi artımı qoruyub saxlayan az sayda ölkələrdən biridir. Ona görə də güzəştlərin tətbiq edilməsi həm də postpandemiya dövrü üçün strateji yanaşmanı nümayiş etdirir.

Bir müddət öncə təsdiq edilən iqtisadi dəstək paketi sahibkarlara uzunmüddətli dövr üçün dəstəyi nəzərdə tutur. Bunlar onu deməyə əsas verir ki, sahibkarlar postpandemiya dövründə daha böyük dövlət dəstəyindən istifadə etməklə öz fəaliyyətlərini genişləndirmək və bununla da iqtisadi artımda daha fəal iştirak etmək imkanı qazanacaqlar.

Fərqanə ALLAHVERDİQIZI