Azərbaycanda mobil bankçılıq xidmətindən istifadə eliyənlərin sayı artıb, bankların proqram təminatlarından istifadə edənlərin sayı milyonu keçib. Ölkə əhalisinin yarıdan çoxunun smartfon istifadə etməsi bankları mobil bankçılığı inkişaf etdirməyə sövq edir.

Hazırda mobil bankçılıqdan istifadə etməklə vətəndaşlar kommunal haqqlarının ödənilməsindən tutmuş mobil telefonda balansın artırılmasına kimi bir çox xidmətlərdən yararlana bilirlər. Hesab üzrə balansın yoxlanılması, digər kart hesabına pul vəsaitinin köçürülməsi və həyata keçirilən əməliyyatlar haqqında çıxarışın əldə edilməsi də mümkündür.

Mərkəzi Bankın Ödəniş sistemləri və hesablaşmalar departamentinin Milli ödəniş sisteminin inkişafı şöbəsinin rəisi Ramil Mahmudovun sözlərinə görə, mobil bankçılıq xidmətlərindən daha çox ödənişlərin həyata keçirilməsi və məlumatların əldə edilməsi məqsədləri üçün istifadə olunur: "Hazırda mobil bankinq xidməti kifayət qədər inkişaf etmiş banklar var. Lakin bəzi bankların məhsul və xidmətlərini təkmilləşdirməsinə ciddi ehtiyac var. Bu, hər bir bankın biznes strategiyasına uyğun olaraq müəyyənləşdirilir.

Müştərilər həftənin 7 günü 24 saat xidmət almaq istəyir. Çünki hər kəsin filiala yaxınlaşmağa, orada növbədə gözləməyə vaxtı yoxdur. Mobil bankçılıq müştəriyə istənilən vaxt, istənilən yerdən bank xidmətlərini əlçatan edir".

Müştərilərin daha çox internet bankçılıqdan istifadə etməsi bankların özünə də sərf edir. Çünki hazırkı rəqabət şəraitində filial açmaq, əlavə işçilər götürmək, filialın icarə haqqından tutmuş kommunal ödənişlərə qədər bütün bu xərclər banklar üçün əlavə yük yaradır. Ona görə də banklar öz xərclərini azaltmaq üçün filial şəbəkəsini azaldaraq mobil bankçılığı inkişaf etdirməyə çalışır.

Ramil Mahmudovun sözlərinə görə, Mərkəzi Bank "Ödəniş xidmətləri haqqında" qanun layihəsi üzərində işləyir, bu qanunun qüvvəyə minməsi ilə bank sektorunda bir sıra yeniliklər olacaq: "Bazara yeni ödəniş təşkilatları daxil olacaq ki, onlar banklarla yanaşı, internet və mobil bankçılıq kimi xidmətləri daha əlverişli şəkildə təklif edəcəklər. Digər tərəfdən, Mərkəzi Bank 7/24 rejimdə fəaliyyət göstərən Ani Ödənişlər Sistemini qurur. Bu sistem bütün ödənişlərin real vaxt rejimində həyata keçirilməsi imkanını yaradacaq".

Səbuhi TURAN