Bakı şəhərində məşğulluq xidməti orqanlarında qeydiyyata alınan işsiz şəxslərin və işsizlikdən sığorta ödənişi alanların sayı açıqlanıb. Bakı Şəhər Statistika İdarəsindən verilən məlumata görə, 2019-cu il oktyabrın 1-dək 29 min 740 nəfər işsiz kimi qeydiyyata alınıb. Onların çox hissəsi Suraxanı rayonunun payına düşüb - 5 min 346 nəfər. Sabunçuda isə 4 min 77 nəfər işsiz qeydə alınıb. Ən az işsiz şəxsin qeydə alındığı rayon isə Pirallahı olub – 343 nəfər. Bakı şəhəri üzrə işsiz şəxslərdən 12 min 497 nəfərini qadınlar təşkil edib.

Qeydə alınan işsizlərdən ancaq 359 nəfərə işsizlikdən sığorta ödənişi ayrılıb. Sığorta ödənişinin hesablanmış orta aylıq məbləği 300,25 manat olub. Ən çox işsizlikdən sığorta haqqı alan Binəqədi rayonunda olub. Pirallahıda isə heç kimə sığorta haqqı ödənilməyib.