2022–2026-cı illərdə qeyri-neft-qaz sektoru orta hesabla 5,2 faiz artacaq
Belə bir şəraitdə Azərbaycan iqtisadiyyatı sabitliyini qoruyur. Strategiya dövrünün yekunlarına baxsaq, 2026-cı ilin gözlənilən nəticələri də nəzərə alınmaqla, 2022-2026-cı illərdə Ümumi Daxili Məhsul orta hesabla ildə 2,7 faiz, qeyri-neft-qaz sektoru isə 5,2 faiz artacaq ki, bu da müəyyən edilmiş hədəfdən yüksəkdir. Bunu Milli Məclisin İqtisadi siyasət, sənaye və sahibkarlıq komitəsinin “Azərbaycan Respublikasının 2027-ci il dövlət büdcəsi haqqında” qanun layihəsinin birinci oxunuşuna dair iclasında çıxış edərkən İqtisadiyyat Nazirliyinin Aparat rəhbəri Elvin Camalov deyib.
Elvin Camalovun sözlərinə görə, ötən dövrdə iqtisadiyyatda keyfiyyət dəyişiklikləri də baş verib. Belə ki, 2026-cı ilin gözlənilən nəticəsi də nəzərə alınmaqla 2019-cu ildən bəri qeyri-neft-qaz ixracı 2,5 dəfə artacaq. 1 oktyabr 2026-cı il tarixinə strateji valyuta ehtiyatları 2018-ci ilin sonu ilə müqayisədə iki dəfə artaraq 89,4 milyard dollara çatıb ki, bu da illik Ümumi Daxili Məhsuldan çoxdur və xarici dövlət borcunu təxminən 20 dəfə üstələyir. Eyni zamanda qeyri-neft-qaz özəl sektorunda əmək müqavilələrinin sayı bu dövrdə təxminən iki dəfə artaraq ümumi müqavilə sayının 56,5 faizini təşkil edir.
