Energetika naziri: “Qaza artan tələbat fonunda investisiya qərarları bu gün verilməlidir”
Rusiya Federasiyasında Qaz İxrac Edən Ölkələr Forumunun (GECF) 28-ci Nazirlər Görüşü keçirilib. Tədbirdə iştirak edən energetika naziri Pərviz Şahbazov çıxışında qlobal qaz bazarındakı çağırışlar, təbii qazın enerji təhlükəsizliyində artan rolu, investisiya ehtiyacları və Azərbaycanın qaz siyasətindən bəhs edib.
Nazirlikdən verilən məlumata görə, geosiyasi gərginliklərin və təhlükəsizlik risklərinin bazarda qeyri-müəyyənliyi artırdığını bildirən nazir, elektrikləşmə, süni intellekt və məlumat mərkəzlərinin inkişafı fonunda təbii qazın strateji əhəmiyyətinin gücləndiyini diqqətə çatdırıb. O vurğulayıb ki, artan tələbat fonunda investisiyaların məhdudlaşdırılması gələcək təchizat təhlükəsizliyi üçün risklər yaradır. “Sabahın etibarlı qaz təchizatı üçün investisiya qərarları bu gün verilməlidir”, - nazir bildirib.
Pərviz Şahbazov Cənub Qaz Dəhlizini uğurlu əməkdaşlıq modeli kimi dəyərləndirərək, Azərbaycanın hasilat və ixrac potensialını artırdığını, bərpaolunan enerji siyasətinin isə qaz ixracını dəstəklədiyini bildirib.
Nazir qlobal qaz bazarında sabitliyin qorunması, investisiyaların təşviqi və istehsalçı-istehlakçı dialoqunun gücləndirilməsi üçün GECF çərçivəsində əməkdaşlığın vacibliyini vurğulayıb.
Qeyd edək ki, Azərbaycan 2015-ci ildən Forumda müşahidəçi üzv statusunda təmsil olunur.
